சர்ச்சையில் 2015 உலகக் கோப்பை கிரிக்கெட்

பத்தாவது உலகக் கோப்பை கிரிக்கெட் போட்டிகள் முடிவடைந்து சில நாட்களே ஆகியுள்ள நிலையில், 2015 ஆம் ஆண்டு நடைபெறவுள்ள அடுத்த உலகக் கோப்பை போட்டி குறித்த சர்ச்சைகள் அதற்குள்ளாகவே தொடங்கிவிட்டன.

பதினோராவது உலகக் கோப்பை கிரிக்கெட் போட்டிகளை ஆஸ்திரேலியாவும் நியூசிலாந்தும் இணைந்து 2015 ஆம் ஆண்டு நடத்தவுள்ளன.

அந்த உலகக் கோப்பை போட்டிகளின் போது டெஸ்ட் கிரிக்கெட்டில் தற்போது விளையாடி வரும் 10 நாடுகள் மட்டுமே பங்கு பெற முடியும் என சர்வதேச கிரிக்கெட் கவுன்ஸிலான ஐ சி சி எடுத்துள்ள முடிவுக்கு, அந்த அமைப்பில் டெஸ்ட் போட்டிகளில் இன்னமும் விளையாடாத ஐ.சி.சியின், உறுப்பு நாடுகள் எதிர்ப்பு தெரிவித்துள்ளன.

தற்போது சர்வதேச கிரிக்கெட் சபையில் 105 நாடுகள் உறுப்பினர்களாக உள்ளன. இதில் டெஸ்ட் போட்டிகளில் விளையாடாத 95 நாட்டைச் சேர்ந்த உறுப்பினர்கள் தங்களது அடுத்த கட்ட நடவடிக்கை குறித்து உயர்மட்டப் பேச்சுவார்த்தைகளை தொடங்கியுள்ளனர்.

உலகக் கோப்பை போட்டிகள் 50 ஓவர்களைக் கொண்ட ஒரு நாள் போட்டியாக தற்போது இருக்கும் நிலையில், சர்வதேச கிரிக்கெட் கவுன்ஸிலின் இந்த முடிவானது பல பிரச்சினைகளை தோற்றுவித்துள்ளது.

உதாரணமாக ஐ சி சி யின் ஒரு நாள் போட்டிகள் தரப்பட்டியலில், டெஸ்ட் போட்டிகளில் இதுவரை விளையாடாத அயர்லாந்து நாட்டு அணி, டெஸ்ட் போட்டிகளில் விளையாடி வரும் ஜிம்பாப்வே நாட்டை விட மேலிடத்தில் இருந்தாலும், அடுத்த உலகக் கோப்பை போட்டிகளில் அயர்லாந்து அணி பங்கு பெற முடியாமல் போகும் நிலை உருவாகும். ஆகவே இது தொடர்பாக தாங்கள் சட்ட நடவடிக்கை எடுப்பது குறித்து ஆலோசித்து வருவதாக அந்நாடு கூறியுள்ளது.

"முடிவு முறைகேடானது"

ஐ சி சி யின் இந்த நடவடிக்கையை முறைகேடான ஒன்று என கென்ய கிரிக்கெட் வாரியத்தின் தலைமை செயல் அதிகாரி டாம் சியர்ஸ் பிபிசியிடம் தெரிவித்துள்ளார்.

"2019 ஆம் ஆண்டு இடம் பெறவுள்ள உலகக் கோப்பை போட்டிகளுக்கு தகுதிச் சுற்றுகள் இருக்கும் என்று அறிவித்துள்ள ஐ சி சி அதை ஏன் அடுத்து நடைபெறவுள்ள 2015 ஆம் ஆண்டு போட்டிகளில் நடைமுறைபடுத்தவில்லை" என்றும் அவர் கேள்வி எழுப்பியுள்ளார்.

நடைபெற்று முடிந்த 10 ஆவது உலகக் கோப்பை போட்டிகளில் பங்கு பெற்ற கனடா நாட்டு அணி அடுத்த உலகக் கோப்பையில் பங்கு பெற முடியாத நிலை தோன்றியுள்ளது. இது தமக்கு பெரியதோர் அடி என கனடா நாட்டு கிரிக்கெட் அணியின் பயிற்சியாளரான புபுது தஸ்நாயக்க பிபிசியிடம் தெரிவித்துள்ளார்.

இத்தாலி கிரிக்கெட் அணியின் மேலாளரும், அந்நாட்டின் கிரிக்கெட் சபையின் தலைமை அதிகாரியுமான லூக் புர்னோவும் ஐ சி சியின் இந்த முடிவுக்கு எதிர்ப்பு தெரிவித்துள்ளார்.

-BBC-

இலங்கை கிரிக்கெட் அணியின் புதிய தலைவராக டில்ஷான்!

இலங்கை கிரிக்கட் அணியின் புதிய தலைவராக திலகரட்ண டில்ஷான் தெரிவு செய்யப்பட்டுள்ளார் என்று தேர்வுக்குழுவின் தலைவர் துலிப் மெண்டிஸ் தெரிவித்துள்ளார்.

இத்தெரிவுக்கு விளையாட்டுத்துறை அமைச்சரின் அங்கீகாரத்தைப் பெற வேண்டியுள்ளது எனத் தெரிவித்தார்.

இதன்படி இங்கிலாந்துக்கு எதிரான சுற்றுப்போட்டிக்கு டில்ஷான் தலைமை தாங்குவார் எனத் தெரிவிக்கப்பட்டுள்ளது.

அதேவேளை உபதலைவர் பதவிக்கான பெயர் இதுவரை தெரிவு செய்யப்படவில்லை எனத் தெரிவிக்கப்படுகிறது.

எனினும் எஞ்சலோ மத்தியூஸ் உப தலைவராக நியமிக்கப்படலாம் என எதிர்பார்க்கப்படுகிறது.

ஹம்பாந்தோட்டை, கிரிந்தயில் நில அதிர்வு: நிலத்தில் பிளவு, வீடுகளில் வெடிப்புகள்

ஹம்பாந்தோட்டை, கிரிந்த பிரதேசத்தில் நேற்று முன்தினமிரவு நில அதிர்வு உணரப்பட்டிருப்பதாக அனர்த்த முகாமைத்துவ நிலையத்தின் பேச்சாளர் பிரதீப் கொடுப்பிலி நேற்றுத் தெரிவித்தார்.

கிரிந்த, யால சந்திக்கு அருகில் சமகி மாவத்தையில் வசிக்கும் சிலர் இரவு 10.10 மணி முதல் இரவு 10.15 மணிக்கு இடைப்பட்ட நேரத்தில் இரண்டொரு வினாடிகள் இந்த அதிர்வை உணர்ந்துள்ளனர் என அனர்த்த முகாமைத்துவ நிலையத்தின் ஹம்பாந்தோட்டை மாவட்ட இணைப்பாளர் எம்.ஜி.ஏ. நந்தன கூறினார்.

இதன் விளைவாக இப்பிரதேசத்திலுள்ள 8 வீடுகளில் வெடிப்புக்களும் சிறு பிளவுகளும் ஏற்பட்டுள்ளன. என்றாலும் ஒரு வீட்டின் கொங்கிaட்டும் உடைந்து விழுந்துள்ளது எனவும் அவர் கூறினார்.

இதேவேளை புவிச்சரிதவியல் ஆய்வுகள் மற்றும் சுரங்க பணியகம் சுரங்க பொறியியலாளர் அசேல பெர்னாண்டோவை சம்பவம் இடம்பெற்றுள்ள பிரதேசத்திற்கு உடனடியாக அனுப்பி வைத்தது. அதேநேரம் இது குறித்து மேலதிக ஆய்வுகளை மேற்கொள்ளவென பூகற்பவியலாளர் மஹிந்த சென விரட்னவையையும் பணியகம் கொழும் பிலிருந்து நேற்று அனுப்பியது.

இச்சம்பவ பிரதேசத்திற்கு உடனடியாக விரைந்து அவதானிப்புக்களை மேற்கொண்ட பணியகத்தின் சுரங்க பொறியியலாளர் அசேல பெர்னாண்டோவுடன் தொடர்பு கொண்டு கேட்ட போது இந்த சம்பவம் கடற்கரையிலிருந்து சுமார் இரு கிலோ மீற்றர் தூரத்திற்கு நிலப்பகுதியில் ஏற்பட்டிருக்கின்றது. இப்பகுதி ஒரு சமதரையே. இப்பிரதேசத்திற்கு அருகில் மலைப் பாங்கான பகுதி கிடையாது.

இந்த அதிர்வு சுமார் ஐநூறு சதுர மீற்றர்கள் பரப்பில் தான் உணரப்பட்டுள்ளது. இதனால் 8 வீடுகளின் சுவர்களில் வெடிப்புக்களும், நிலத்தில் சிறு பிளவுகளும் ஏற்பட்டுள்ளன.

ன்றாலும் ஒரு வீட்டின் கொங்கிaட்டும் இடிந்து விழுந்துள்ளது. இங்கு சில வீடுகளின் நிலத்தில் சுமார் 20 சென்றி மீற்றர்கள் நீளத்திற்கு சுமார் 6 மில்லி மீற்றர்கள் அகலத்திற்கு சிறு பிளவுகளும் ஏற்பட்டுள்ளன. இச்சமயம் வீடுகளில் சில பொருட்கள் உருண்டு விழுந்ததையும், வீடுகளின் ஜன்னல்கள் ஆடியதையும் பிரதேச வாசிகள் உணர்ந்துள்ளனர் என்றார்.

இது விடயமாக வானிலை அவதான நிலையத்துடன், புவிச்சரிதவியல் ஆய்வு மற்றும் சுரங்கப் பணியகத்துடன் தொடர்பு கொண்டு கேட்ட போது பூகம்பம் மற்றும் நில அதிர்வுகளை பதிவு செய்யும் எமது இயந்திரங்களில் மேற்குறிப்பிட்ட நேரத்தில் எதுவுமே பதிவாகவில்லை என்றனர். ஆன போதிலும் இது தொடர்பான மேலதிக ஆய்வுகளை மேற்கொள்ளவென கொழும்பிலிருந்து பூகற்பவியலாளர் அனுப்பப்பட்டிருப்பதாக பணியகத்தின் அதிகாரியொருவர் கூறினார்.

குவைத்துக்குச் சென்று பிரபல திருடியாக மாறிய இலங்கைப் பெண்: பொலிஸாரால் கைது

தங்க ஆபரணங்களைத் திருடிய சம்பவத்துடன் தொடர்புடைய இலங்கைப் பெண் ஒருவர் குவைத்தில் கைது செய்யப்பட்டுள்ளார். குவைத்திலுள்ள ஹவாலி அபிவிருத்தி சந்தையில் வைத்து குறித்தப் பெண் தங்க ஆபரணத் திருட்டில் ஈடுபட்டுள்ளதாக அந்த நாட்டு பொலிஸார் தெரிவித்துள்ளனர்.

குறித்த இலங்கைப் பெண் திருட்டில் ஈடுபட்டதை சந்தைத் தொகுதியில் பொறிக்கப்பட்டிருந்த பாதுகாப்பு கமராக்கள் பதிவு செய்ததை அடுத்து சந்தைத் தொகுதி உரிமையாளர் பொலிஸாருக்கு அறிவித்துள்ளார்.

சந்தை உரிமையாளரிடம் தங்க ஆபரணங்களைக் காட்டுமாறு கூறிவிட்டு அதில் ஒரு ஆபரணத்தை எடுத்து குறித்த இலங்கைப் பெண் தனது உடலுக்குள் மறைத்துள்ள காட்சியை பாதுகாப்பு கமரா படம்பிடித்துள்ளது.

இதனை அடுத்து குறித்த இலங்கைப் பெண் கைது செய்யப்பட்டதுடன், பெண்ணிடம் மேற்கொள்ளப்பட்ட விசாரணைகள் மூலம் அவர் 12 திருட்டுச் சம்பவங்களில் தொடர்புபட்டுள்ளமை தெரியவந்துள்ளதென குவைத் பொலிஸார் குறிப்பிட்டுள்ளனர்.

அரச முகாமைத்துவ இணைந்த சேவைகள்: 2500 பேருக்கு புதிய நியமனம்; 7ம் திகதி ஜனாதிபதி வழங்குவார்

அரச முகாமைத்துவ இணைந்த சேவைகள் உத்தியோகத்தர்களாக 2500 பேர் புதிதாக நியமனம் பெறவுள்ளனர். இவர்களுக்கான நியமனங்களை நாளை மறுதினம் 7ம் திகதி ஜனாதிபதி மஹிந்த ராஜபக்ஷ அவர்கள் வழங்கவுள்ளார்.

இதற்கான உத்தியோகபூர்வ நிகழ்வு நாளை மறுதினம் அலரிமாளிகையில் நடைபெறவுள்ளதுடன் நாடளாவிய 25 நிர்வாக மாவட்டங்களிலிருந்து தேர்ந்தெடுக்கப்பட்ட 2500 பேர் ஜனாதிபதியிடமிருந்து தமக்கான நியமனக் கடிதங்களைப் பெற்றுக் கொள்ளவுள்ளனர்.

அரச முகாமைத்துவ சேவைக்கான 2010 திறந்த போட்டிப் பரீட்சையில் சித்தியடைந்து அதன் மூலம் தேர்ந்தெடுக்கப்பட்டவர்களே இப்புதிய நியமனங்களைப் பெறவுள்ளனர்.

3300 பேருக்கு புதிய நியமனங்கள் வழங்கப்படவுள்ளதுடன் அண்மைக்கால இயற்கை அனர்த்தம் காரணமாக நேர்முகப்பரீட்சைக்குச் சமுகமளிக்க முடியாதவர்களுக்கு பின்னர் நியமனங்கள் வழங்கப்படுமென பொது நிர்வாக உள்நாட்டலுவல்கள் அமைச்சு தெரிவித்தது.

இவர்கள் பின்னர் கொழும்புக்கு அழைக்கப்பட்டு நேர்முகப் பரீட்சைக்கு உட்படுத்தப்படுவர். அப்பரீட்சையில் தகைமை பெறுவோருக்கு பிறிதொரு தினத்தில் நியமனம் வழங்கப்படவுள்ளது.

அரச முகாமைத்துவ திறந்த போட்டிப் பரீட்சைக்கு 2010ம் ஆண்டு சுமார் 20 ஆயிரம் பேர் தோற்றினர். அவர்களில் அதிகூடிய புள்ளிகள் பெற்று தகைமைகளுக்கான நேர்முகப் பரீட்சைக்கு உட்படுத்தப்பட்டோரில் இருந்தே மேற்படி 2500 பேரும் தேர்ந்தெடுக்கப்பட்டுள்ளனர்.

அலரி மாளிகையில் நாளை மறுதினம் 7ம் திகதி நடைபெறும் நியமனம் வழங்கும் வைபவத்தில் அமைச்சர் ஜோன் செனவிரத்ன உட்பட அமைச்சர்கள், பிரதியமைச்சர்கள் பலரும் கலந்து கொள்ளவுள்ளனர்.

'சங்கக்கார பதவி விலகினார்'

ஒரு நாள் மற்றும் இருபது இருபது ஆட்டங்களுக்கான இலங்கை அணியின் அணித் தலைவர் பதவியில் இருந்து தான் விலகுவதாக குமார் சங்கக்கார அறிவித்துள்ளார்.

தனது முகாமையாளரின் ஊடாக அவர் இது குறித்து வழங்கிய தகவலில் இங்கிலாந்து மற்றும் ஆஸ்திரேலியா ஆகிய அணிகளுடன் நடக்கவிருக்கும் டெஸ்ட் ஆட்டங்களை முன்னிட்டு இலங்கை கிரிக்கட்டின் டெஸ்ட் அணித் தலைவராக தான் தற்காலிகமாக தொடர்வதாகவும் அவர் கூறியுள்ளார்.

ஆஸ்திரேலியாவில் 2015 இல் நடக்கவிருக்கும் உலக கிண்ணப் போட்டியில் இலங்கை அணிக்கு ஒரு இளம் தலைவர் தேவை என்று தான் நம்புவதால், கடந்த உலக கிண்ணப் போட்டிக்கு முன்னதாகவே தான் இந்த முடிவை எடுத்திருந்ததாக 33 வயதான சங்கக்கார தெரிவித்துள்ளார்.

எதிர்வரும் ஜூன் மாதம் இங்கிலாந்து அணியுடனான சுற்றுத்தொடருக்குப் பின்னர் இலங்கை கிரிக்கெட் அணியின் தலைவர் பதவியில் இருந்து தான் விலகவுள்ளதாக குமார் சங்கக்கார தெரிவித்துள்ளார். இது தொடர்பாக குமார் சங்ககாரவின் ஊடக பேச்சாளர் சாலி ஓஸ்டின் வீரகேசரி இணையத்தளத்திற்குத் தெரிவித்தார். அவர் மேலும் தெரிவிக்கையில், விலகல் தொடர்பாக இலங்கை கிரிக்கெட் கட்டுப்பாட்டுச் சபை அதிகாரிகளுக்கு ஏற்கனவே தான் அறிவித்துள்ளதாகவும் தற்போதைய போட்டியிகளிலிருந்து ஓய்வு பெறும் திட்டமில்லை எனவும் தொடர்ந்து விளையாடுவார் எனவும் தெரிவித்துள்ளார்.

Kumar Sangakkara statement

“தேசிய அணியின் தலைவர் பதவியிலிருந்து விலகுவதாக நான் தீர்மானித்துள்ளேன். எதிர்வரும் 2015 ஆம் ஆண்டு நடைபெறவுள்ள அடுத்த உலகக் கிண்ண கிரிக்கெட் தொடருக்கு புதிய, சிறந்த அணித் தலைவரை தெரிவுசெய்ய வேண்டியதன் அவசியத்தை நான் உணர்ந்துள்ளேன்.

இவ்வாண்டு நடைபெற்ற உலகக் கிண்ண கிரிக்கெட் தொடருக்கு முன்னதாக நான் இந்தத் தீர்மானத்தை எடுத்திருந்தேன். அடுத்த உலகக் கிண்ணத் தொடர் நடைபெறும்போது எனக்கு 37 வயதாகியிருக்கும் அந்தச் சந்தர்ப்பத்தில் சிறப்பாகவும் அர்ப்பணிப்புடனும் செயற்படும் தலைவர் ஒருவர் அவசியமாகிறார்.

அணித் தலைவராக இருந்த காலப்பகுதியில் நாட்டுக்காக விளையாடியதில் மகிழ்ச்சியும் திருப்தியும் உண்டு. எனினும் உலகக் கிண்ண இறுதிப்போட்டியில் தோல்வியைத் தழுவிக்கொண்டமை வருத்தமளிக்கிறது. ஆனபோதும் நாம் சிறப்பாக விளையாடினோம் என்பதில் ஐயமில்லை.

உள்நாட்டிலும் வெளிநாடுகளிலும் உள்ள எமது ரசிகர்கள் எமக்கு பக்கபலமாக இருந்தார்கள். அவர்களின் ஒத்துழைப்பை நான் என்றும் மறக்க மாட்டேன். உத்வேத்துடன் முன்னேறுவதற்கு அவர்கள் தந்த ஆதரவும் காரணமாக அமைந்திருந்தது. அதனால் ஒவ்வொரு வீரரும் நன்றிக்கடன் உடையவராக இருக்கிறோம்.

அணித் தெரிவாளர்களை நேற்று சந்தித்து எனது தீர்மானம் குறித்து ஆலோசித்தேன். புதிதாக நியமிக்கப்படும் தலைவர் சிறந்த நிலையில் முன்னேறுவதற்கு நாம் இடமளிக்க வேண்டும் என்பதையும் அவர்களிடம் குறிப்பிட்டேன்.

ஓய்வுபெறுவது குறித்து நான் எந்த முடிவும் எடுக்கவில்லை. எதிர்காலத்திலும் சிறந்த முறையில் எனது திறனை வெளிக்காட்ட முயற்சி செய்யவுள்ளேன்.

இந்தத் தருணத்தில் எனது அணிவீரர்களுக்கும் பயிற்சியாளர்களுக்கும் எனது நன்றிகளைத் தெரிவித்துக்கொள்கிறேன். அத்துடன் அணியை சிறப்பாக வழிநடத்திச்செல்ல உறுதுணையாக இருந்த எனது மனைவி, பிள்ளைகள் குடும்பத்தாருக்கும் நன்றி பகர்கிறேன். ,

-BBC & Virakesri-